Hierdie unieke versameling is onder meer die vrug van prof SP Engelbrecht (1891-1977), kerkhistorikus en teoloog, se intense belangstelling in die geskiedenis van die Kerk en sy besef dat die tasbare oorblyfsels van hierdie geskiedenis vir die nageslag bewaar moet word. ‘n Kosbare kerk- en kultuurhistoriese skat wat die NHKA se Protestantse herkoms en inheemse voortgang in Suider-Afrika uitbeeld.

Ons kerkmuseum is, naas ons kerkargief, die amptelike geheuebank van die Nederduitsch Hervormde Kerk van Afrika (NHKA) wat getuig hoe God mense in sy koninkryk gebruik (het). Verskillende interessante voorwerpe vertel die verhaal van God se kinders in die NHKA en in die wyer gemeenskap.

Ons bewaar vir die nageslag voorwerpe wat vertel van geloof en hoop.

Hier begin ons vertel van die Bybellande af, deur die vroeë kerk, deur die Reformasie / Kerkhervorming, in suidelike Afrika vanaf Jan van Riebeeck 1652, verby 1824 toe die kerk in Suid-Afrika selfstandig georganiseer is, deur die Groot Trek en die verhaal van die Voortrekkerkerk en vestiging veral in die ou Transvaal in die Zuid-Afrikaanse Republiek (ZAR), die Vryheidsoorloë van 1880-1881 en 1899-1902, tot diep in die 20ste eeu. Die museum is in “verskillende vertrekke” ingerig – tydperke, maar ook temas.

Die museum wil die NHKA van dooplidmaat tot bejaarde, navorsers en ander kultuurbelangstellendes dien. Nie net NHKA-lidmate sal die museum interessant vind nie, maar ook ander kerklidmate of belangstellers in geskiedenis. Hier kan veral kinders (die begeleide toer word dan spesifiek gerig op kinders) iets van die geskiedenis leer wat nie meer op skool of dalk selfs in kategese gehoor word nie.

Kosbaarhede word volgens ‘n vaste beleid versamel, bewaar, vertoon en per begeleide toer deur die kurator bekend gestel aan besoekers. ‘n Excel-rekenaardatabasis met foto’s word naas ‘n harde kopie aanwinsregister gebruik vir alle driedimensionele geskiedkundige artefakte. Verskeie skenkings word deurentyd ontvang en is hartlik welkom.

Verskillende kleiner versamelings is die boustene van die groter versameling wat sedert die begin van die 20ste eeu deur prof SP Engelbrecht begin versamel is. Om net ‘n paar voorbeelde te noem: Kerkmeubels en verwante voorwerpe soos banke, kansels, doopvonte, nagmaaltafels en nagmaalgerei, Bybels en Gesangeboeke, kollektesakkies, orrels, ‘n kerktoringspits ensovoorts. Persoonlike items van predikante, ampsdraers en lidmate soos lessenaars, stoele, keile, manelle, togas, koffers en dies meer. Gebruiksitems uit verskillende tydperke, klere, veral itema rondom die Anglo-Boereoorlog / Suid-Afrikaanse Oorlog, vlae en memorabilia. Portrette, skilderye, plakkate, beeldhouwerke, hout, porselein en glas. Sustersvereniging se versameling, barmhartigheidsdiens, kategese en teologiese opleiding, sendingwerk, kapelaanswerk, gemeentes elders in Afrika, kerkfeeste, basaars en herdenkings, poppe en speelgoed, kerklike administrasie, publikasies en Bybelvertaling en les bes die geskiedenis van die museum self. Selfs voorwerpe van die San en die steentydperke.

Die SP Engelbrecht Museum pleeg voortdurend oorleg met die argivaris van die Kerkargief wat by Voortrekkermonument in die Erfenisstigting-gebou is (argief@nhk.co.za) en die biblioteekversamelings van die NHKA. Die museum huisves driedimensionele voorwerpe – die argief en biblioteek huisves boeke, registers, foto’s en dokumente. In die museum sal jy dus ‘n geraamde foto (portret) vind en in die museum ‘n foto in ‘n bewaringskoevert in die temperatuurbeheerde kluis.

Ons droom vir die toekoms is om steeds meer besoekers te ontvang. Ons is dankbaar om saam met die argief en biblioteek (met verskillende versamelings) ‘n subkomitee van bewaring onder die sambreel van die Sentrum vir Reformatiese Teologie te vorm.

Ons wil ons lidmate (en enige ander persone) se historiese bewussyn aanwakker en NHKA-lidmate weer trotse Hervormers laat wees!